De Akademie för uns kölsche Sproch es de mieste Lück vör allem durch de
Kölsch-Seminare ene Begreff. Vier Semester lang ka'mer allerhand üvver kölsche
Orgenale, de Stadtgeschichte, kölsche Literatur un de kölsche Sproch selvs studeere.
Wa'mer dann all die Pröfunge hinger sich gebraht hät, frög mer sich: "Un wat jetz?"
Do gitt et dann Lück, die maachen ene Stammdesch op, andere dun sich zesamme,
för en Diplomarbeid zom Thema Kölle ze schrieve un widder andere frößele stell
för sich allein. Der Heinz Koll hät sich för e Beispill vürgenomme, en Arbeid üvver 'De vier Botze' ze schrieve. Ene kleine Uszog dodrus künnt Ehr Üch aan luure, wann Ehr hee drop däut!

Wä su en Diplomarbeit noh zwei Johr fäädig hät, kann met Rääch stolz op
sich sin un sich freue, dat hä et Kölsch-Diplom hät. Et stich nämlich vill, vill Arbeid
dren! De Theme för e Kölsch-Diplom künne alles Mögliche sin. En ganze Rötsch
Arbeide gitt et üvver dat Thema "Och hückzedags gitt et noch Orgenale". Lück
wie der Arno Faust, der Hermann Götting oder der Herrings-Düres hüren dobei oder der Orgels-Pitter.

Och beröhmte Lück sin Arbeide gewidmet: dem Ludwig Sebus oder dä Höhner. Et gitt Interessantes üvver de Stadtgeschichte, üvver kölsche Veedele, üvver Bröcke, Brunne, Kirche, üvver der Stollwerck, et Huhwasser un noch vill mih. Us su mäncher Arbeid es sugar e Boch gewoode, su wie dat üvver de Höhner oder dat üvver der Ludwig Sebus. Ävver och die andere han sich die Möh nit ömesöns gemaht. Dann en unsem Archiv ka'mer sämpliche Diplomarbeide beluure un sugar uslihne.