von Alice Herrwegen

(Infoheft Akademie för uns kölsche Sproch, Mai-Sept. 2004, S. 30)

"Ääze, Bunne, Linse, dat sin se"! Wä gitt sich hüggzedags noch die Möh jet ech Kölsches op der Desch ze bränge? Do weed met Trennkoss, Nouvelle Cuisine - wo de su god wie nix om Teller häs - erömexperimenteet, mer koch chinesisch, vegetarisch, oder mer hät kein Loss för ze koche un gitt sich met enem Fast - Food - Pappendeckelsbrüdche zefridde. Un wo blieven uns leckere Frikadellcher? Die schmecken doch dreimol besser wie dat grau Gehacks met dä rud Zaus!

Et geiht doch nix üvver ene Suurbrode, et bess vum Pääd, met Klöß. Do hät jo su jederein si eige Rezepp. Dä ein schwört op Rusinge, dä andere op Printe un der drette bingk de Zaus met Schwatzbrud.
Och wat de Witwe Bolte ald esu gään ens "wollte", künnt ens widder op der Fooderkaat stonn: Suure Kappes un Püree. God, et muss jo nit direk e Hämmche dobei, jet Kasseler deit et och.

Oder wie wör et met Rievkoche? Gitt zo vill Möff en der Köch?

Jeck, dat hööt dobei!

Wat och god schmeck, es en grön Bunnezupp, schön sämig met Speckmöbbelcher dren.
Fröher, wie mer noch kei BSE kannt, hät mer sich jo och an ener ööntliche Rindfleischzupp met Markbällcher vermaht. Ov mer sich dat hügg noch traue kann?

Gääschtezupp ov Ääzezupp schmeck och met Mettwööschcher. För e flöck Meddagesse reck och ald ens en Brodwoosch met Äädäppel un Schlot. Wie wör et - för noch winniger Zigg - met enem stramme Max? En Schnedd Brud met gekochtem Schinke un e Speegelei drüvver.

Bei Himmel un Ääd met Blodwoosch sin de Meinunge gedeilt, die eine mögen et üvverhaup nit un die andere looßen alles andere doför stonn. Wichtig es jo, dat mer gerauchte Blodwoosch met ener faste Koosch drömeröm kauf un kein Flönz. Söns fällt dat ganze Spill usenander un süht us wie ene Kupp Gedr... Kenner nemmen och fresche Äppel un koche die, statt Appelkompott, wie en mancher kölsche Weetschaff ze krige. Dä fresch gekochte Tütt unger de Ääpel gemengk, dat es doch mih Himmel wie Ääd!
För de Pänz es et Schöns Pannekoche oder Verwenntschneddcher, die flock gemaht sin:

Jet Milch met enem Eigääl vermengk un en Pris Salz dren. En Schiev Platz weed dodren geschwenk un en der Pann en Botter gebrode. Dann kütt Zucker drop un fäädig es die herrliche Biesterei.

För et Ovendesse sin Tatar, kölsche Kaviar oder Soleier en nette Avwähßelung

Jetz fängk su mancher secher aan ze küüme: Nä, dat es doch all esu ungesund!

Ävver wesst ehr ens jet wat?

Eeschtens: Wat soll dat schläächte Levve nötze?

Zweitens: Wat wör et ganze Levve wäät, wann sich der Minsch kein Freud dren mäht?

Drettens: Wä luuter zo gesund läv, weed met der Zigg schlääch gesennt, un dat schleiht sich bestemmp widder op de Gesundheit nidder. Ich sage bloß "psychosomatisch"!

Nä, nä, do fange mer gar nit eesch met aan, do geneeße mer doch direk dat bessche ungesunde Krom un han dobei e Laache em Geseech. Un jeder weiß jo:

Laache es gesund!