aus dem Programm des Kölsch Kabarettche "Pottpürree"
von Alice Herrwegen

(Infoheft Akademie för uns kölsche Sproch, Nov.2004 - April 2005, S. 3)

...denn do gehööt e hin! Jo, wä kennt dat herrliche Leed vun de Bläck Fööss nit?
Wann die domols gewoss hätte, wat se hügg wesse, hätte se villleich e ganz ander Leed gemaht, för e Beispill: "Do laachs de dich kapodd, der Dom es fott!" Sag, dat es der ävver villleich och e Dinge! Üvverall en der Welt es mer stolz op sing Kultordenkmöler un hee? Do verbauen die de Sich op der Dom! Do hät de UNESCO doch Rääch, wann se jetz dem Dom dä Status "Weltkulturerbe" avspreche wolle. Dat kann jo woanders kei Minsch verstonn, ne? Do ha'mer su ene schöne Dom, wo de andere sich de Fingere noh lecke däte, dä andere op e Podess stelle däte, un mir? Maachen us Kölle Klein Manhattan, weil mer met der Zigg gonn well! Es jo doll! Ha'mer nit ald genog schön Klötz us de 70er Johre erömstonn? Dat wor domols och der letzte Schrei, ävver ens bei Leech besinn, es dat an Hässlichkeit jo zom Deil kaum ze üvverbeede. Ävver su ne Dom, dä bliet doch iwig schön. Wat denke sich de Verantwortliche bei esu jet? Op jede Fall denken se ze koot! Sid Ehr en letzter Zigg ald ens vun der A4 noh Köllen erengefahre? Wat beed sich do et eesch dem Aug? Ene große Klotz met zwei luus spetze Türmcher drop. Do frög sich der Touriss jo: Wat han se dann do verstoche? Ov dat am Engk dä beröhmte Kölner Dom es? Ävver villleich wollten se jo och de kölsche Mentalität jet erusstriche. Der Kölsche steiht jo en däm Rof vun Nator us si Leech unger der Scheffel ze stelle. Un weil hä evvens nit esu gään strunz, deit mer en met däm schwere Kultorerbe gar nit eesch belaste! Ja, oder hat Ehr en ander Erklärung? Hee alsu minge Vürschlag för der neuste Bläck Fööss -Hit:

Refrain
Do laachs de dich kapodd, der Dom es fott!
Dä han se jetz et eesch ens engemott.
Jo, do sök mer sich zom Schänzche
su wie noh nem selde Plänzche,
doch der Dom es för't Verrecke nit ze sinn.
Doför sühs de ne Kaventsmann,
su ne Klotz vör dingem Aug dann,
jo, no sag mer ens, wo es dä Dom bloß hin?

Em Sommer kumme mir Touriste för der kölsche Dom.
Mer woren ald en London, en Paris un och en Rom.
St. Pauls un Sacré Coeur, mer han der Petersdom beloot,
de kölsche Kathedral ze sinn, dat dät uns jetz noch god.

Refrain

Mer laufen uns noch Plattföß, Jung, dat driev uns en der Schweiß,
mer süht vör luuter Bäum der Wald nit, och, wat es dat heiß!
Uns deit ald alles wih, wat denk der Kölsche sich dobei?
Ich gläuv, dä Städteplaner es esu jet einerlei.

Refrain

Do mööten doch de Kölsche ens de Muul opmaache flöck,
die han et doch och söns off met der Schnüss su god gejöck,
jo, wollt ehr nit dä Dom befreie för die fremde Lück?
Dann maat ens jet dogäge, besser gester noch wie hügg!

Refrain